تغنى الشاعر كاظم الوحيد في ابوذيات وأبيات شعرية خلد فيها أسماءا لاعضاء فرقة طيور دجلة ، تحدث عنهم وعن لسانهم ابتهاجا بتكريم المايسترو علاء مجيد ، المشرف الفني للفرقة ، قلادة الابداع. أمتع الوحيد اعضاء وضيوف طيور دجلة في المؤتمر السنوي الخامس لجمعية طيور دجلة الاحد 18/10/2015

أشحلات طيور دجلة

الحمد لله الفرح هاليوم دك بابي
فرحو من صدك كل اهلي وأحبابي
تشعل شمع بروين
واتكص الكيك شيرين
ورئيفة وأمل حضرو همه وأصحابي
*************
أشحلات طيور دجلة رسمن الصورة
انتصار تصيح والله الليله مسرورة
نوال لثورة كالت خيتي مشكورة
وفيكي تكول افرح عندي أسبابي
الحمد لله الفرح هاليوم دك بابي
*************
ليلى بالفرح غنت أغانيهه
زهيرة والهلاهل لايكه عليهه
زينة هالحفل لمياء تشريهه
وفاء ابياس كالت زينت بابي
الحمد لله الفرح هاليوم دك بابي
****************
سعاد بشوك غنت غنوة الافراح
ويونيه اتكول كَََلبي هواي مرتاح
تنثر هيل هيفاء بعطر فواح
تاريخ الفرح خطيته بكتابي
الحمد لله الفرح هاليوم دك بابيimage
*****************

بسعاد الصاغت الفكره …..وخطت

ونهج ميلاد هالواضح …… وخطت

دليلة رسمت بواهس ……. وخطت

حضارة سومر وبابل سويه
*********************************
الف ليلة قريناها ………… وليله
بنهار أسمع أغانيكم ………وليله
لميس وذكرى وي سندس … وليلى
وحنان الصوت والبحه الشجيه
********************************
الوادم طربت لفنكم …… وسرها
وأخذها بعيد بأنغامه …. وسرها
فرقة ونجحت بهمة ……..وسرها
علاء القائد لهاي السريه
*********************************

حـــلوه الصوره منك … يا مصور
عمر للفرقه يركض … يامه صور
دعيت البــاري ربنه … يا مصور
يحمي حسين من شر وأذيه

**************************
على لسان طيور دجلة للمايسترو

حلاته سلمك موزون …..نوطه
وعلى صدرك نحط ياريت …….نوطه
نصعد للسما وهيهات …نوطه
الطيور نجوم وصلت للثريه
**************
على سنين الصبر كَََلبك …..نزفها
عروس الفرحه تستاهل ……نزفها
تهاني الفوز كل احنه …….نزفها
ونطش ضحكاتنه لفوزك هديه
*************
نشيد الفرقة سلطنه …. وسرنه
وفرحنه لخبر تكريمك … وسرنه
هوايه وبيها نتمسك …. وسرنه
نموت وما نبدلها الهويه